Канаш округӗнче пурӑнакан Кудряшовсем ҫемье ҫавӑрнӑранпа 60 ҫул ҫитнине паллӑ тунӑ.
Георгий Павловичпа Мария Тимофеевна 1965 ҫулта пӗрлешнӗ. Вӗсем тӑватӑ ача ҫуратса ӳстернӗ. Халӗ тӑхӑр мӑнукпа тата икӗ кӗҫӗн мӑнукпа савӑнса пурӑнаҫҫӗ. «Пирӗн чи пысӑк пуянлӑх – ачасемпе мӑнуксем», – теҫҫӗ вӗсем.
Георгий Павлович пушар хуралӗн водителӗнче 35 ҫул ытла ӗҫленӗ. Мария Тимофеевна вара медицина тытӑмӗнче вӑй хунӑ, вӑл – Чӑваш АССРӗн тава тивӗҫлӗ фельдшерӗ. Халӗ те вӗсем ӗҫсӗр лармаҫҫӗ, кил хуҫалӑхӗнче тӑрмашаҫҫӗ.
Авӑн уйӑхӗн 18-мӗшӗнче Чӑваш Енӗн Наци вулавӑшӗнче «Народный писатель Чувашской АССР Н. Т. Терентьев и чувашские драматурги» (чӑв. Чӑваш халӑх писателӗ Н.Т. Терентьев тата чӑваш драматургийӗ) ятпа ҫавра сӗтел иртӗ. Ӑна Николай Терентьев ҫуралнӑранпа 100 ҫул ситнине халаллӗҫ.
Николай Терентьев - драматург, тӑлмачӑ, артист, театр критикӗ; К.В. Иванов ячӗллӗ патшалӑх премийӗн Профессилле ҫыравҫӑсен П. Осипов ячӗллӗ премийӗн, К. Станиславский ячӗллӗ РСФСР патшалӑх премийӗн лауреачӗ.
Вӑл Канаш районӗнчи Кӑшнаруй ялӗнче ҫуралнӑ. Чӑваш патшалӑх педагогика институтӗнчен, Мускаври А.В. Луначарский ячӗллӗ театр ӳнерӗн институтӗнчен, А.М. Горький ячӗллӗ Литература институчӗ ҫумӗнчи Аслӑ литература курсӗнчен вӗренсе тухнӑ.
Тӑван колхозра счетоводра, кайран шкулта пуҫламӑш классен учителӗнче ӗҫленӗ. Кайран вара вӑл Чӑваш патшалӑх академи драма театрӗнче актер тата литература пайӗн заведующийӗнче тӑрӑшнӑ.
Канаш округӗнче пурӑнакан кинемей 100 ҫулхи юбилейне паллӑ тунӑ. Наталия Ильинана Канашри элеватор ертӳлӗхӗ те саламланӑ. Вӑл тивӗҫлӗ канӑва тухиччен унта весовщицӑра ӗҫленӗ.
Унӑн пӗтӗмӗшле ӗҫ стажӗ – 45 ҫул. Тӳрӗ чунпа нумай ҫул вӑй хунӑшӑн ӑна ӗҫ ветеранӗн ятне панӑ.
Наталия Борисовна мӑшӑрӗпе Василий Ильичпа 4 ача ҫуратса ӳстернӗ. Халӗ вӑл 8 мӑнукпа, 10 кӗҫӗн мӑнукпа савӑнса пурӑнать.
Чӑваш кӗнеке издательствинче Николай Агаковӑн «Хӗвел ӑшшиллӗ туйӑм» кӗнеки пичетленсе тухнӑ.
Николай Агакова Канаш тӑрӑхӗнче аван пӗлеҫҫӗ тесе хыпарланӑ Ҫеҫпӗл ячӗллӗ вулавӑшра. Унӑн калавӗсем, повеҫӗсем, очеркӗсем «Канаш ен» хаҫатра час-часах пичетленеҫҫӗ.
Ҫӗнӗ кӗнеке редакторӗ – Ольга Федорова, художникӗсем – Игорь Кугураков тата Наталия Орлова.
Кӗнекене аслӑ классенче вӗренекен шкул ачисем валли тесе кӑларнӑ.
Николай Михайлович 1955 ҫулхи авӑн уйӑхӗн 5-мӗшӗнче Канаш районӗнчи Шуркассинче ҫуралнӑ.
Канаш округӗнчи Янкӑлч ялӗнче пулнӑ пушарта 85-ри кинемейпе унӑн ывӑлӗ ҫунса кайнӑ,
Пушар ӗнер 22 сехетре тухнӑ. Ҫулӑм тӳрех пӳрте, хуралтӑ таврашӗсене ярса илнӗ. Ӑна сӳнтерес ӗҫе 9 ҫӑлавҫӑ тата 3 техника хутшӑннӑ.
Пушар хыҫҫӑн 85-ри хӗрарӑмӑн тата унӑн 1964 ҫулта ҫуралнӑ ывӑлӗн виллисене тупнӑ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.
Канаш округӗнчи Сикккасси ялӗнчи Шпаковсен «Тарават» ҫемье ансамблӗ Тутарстанри Ҫӳлти Услон районӗнче иртнӗ фольклор ушкӑнӗсен фестивалӗнче пулнӑ.
Куракансем чӑваш юрӑҫисене кӑмӑллӑн йышӑннӑ, тӗрлӗ енлӗ культурӑна тивӗҫлипе хакланӑ. Чӑваш сӑрине те асӑрхамасӑр хӑварман. Ӑна Шпаковсем ӗлӗкхи рецептпа вӗретнӗ. Хӑнасем ӑна хаваспах тутанса пӑхнӑ.
Канаш округӗнчи хӗрарӑма тӑрук япӑх пулса кайнӑ. Тухтӑрсем унӑн чӗрипе кӑлтӑксем пулнине тупса палӑртнӑ. Ӑна пӗр тӑхтамасӑр кардиолог пулӑшӑвӗ кирлӗ пулнӑ.
Хӗрарӑм хӑйне япӑхрах та япӑхрах туйса пынӑ. Машинӑпа Шупашкара кайма вара часах мар. Ҫапла санавиаци яма йышӑннӑ.
Вертолет килсе пациента хулана ҫур сехетре илсе ҫитернӗ. Унти тухтӑрсем ӑна тӳрех сиплеме пуҫланӑ.
Канаш округӗнчи Тури Юнтапа ялӗнче пурӑнакан мӑшӑр, Ефремовсен ҫемйи, ылтӑн туйне паллӑ тунӑ.
Петр Николаевичпа Мария Ивановна пӗр-пӗрне мӗн ачаран пӗлеҫҫӗ. Вӗсем кӳршеллӗ ӳснӗ.
Шкул хыҫҫӑн Мария Улатӑрта вӗреннӗ, Петр вара – Ленинградра. Кайран каччӑ ҫара кайнӑ, унтан таврӑнсан хӗре качча тухма ыйтнӑ.
Петр Николаевич Канашри аш-какай комбинатӗнче ӗҫленӗ, Мария Ивановна Горький чукун ҫул ҫинче завсклад пулнӑ.
Вӗсем 4 ача ӳстернӗ, халӗ мӑшӑра 7 мӑнукӗ телей кӳрет.
Чӑваш Ене ҫӗнӗ 39 автобус ҫитнӗ. Вӗсем авӑнӑн 1-мӗшӗнчен ачасене илсе ҫӳреме пуҫлӗҫ.
Ытларах автобуссене Канаш, Вӑрнар, Хӗрлӗ Чутай, Шупашкар округӗсене ярӗҫ. Комсомольски, Ҫӗрпӳ, Елчӗк округӗсене икшер автобус лекӗ. Элӗк, Патӑрьел, Йӗпреҫ, Куславкка, Красноармейски тата ытти округа (пӗтӗмпе 10 округа) пӗрер автобус парӗҫ.
Ҫавӑн пекех Ҫӗрпӳ агротехникумне, Ҫӗмӗрлери политеха, Шупашкарти тата Ҫӗнӗ Шупашкарти колледжсене те автобус лекӗ.
Ку хыпара ҫак йӗркесен авторӗ ӑнсӑртран, халӑх тетелӗнчи хыпартан пӗлчӗ.
Тӗрӗссипе, хыпарӗ пачах урӑххи ҫинчен. Унта Лидия Филиппова ҫыравҫӑ Канаш районӗнчи Малтикас ялӗнче тӗрлӗ вӑрҫӑра пуҫ хунӑ ентешӗсене асӑнса та сума суса палӑк уҫни пирки хӑпартланса та хавхаланса пӗлтернӗ, ырӑ ӗҫе хутшӑннисене тав тунӑ. Пӗр предложенипе вара хӑйне «Малтикас ялӗн хисеплӗ гражданинӗ» ят панӑшӑн ентешӗсене тав тунӑ.
Лидия Филиппова — писатель, поэт, журналист, публицист, филологи наукисен кандидачӗ, Нестер Янкас премийӗн лауреачӗ. Унӑн литературӑри псевдонимӗсем: Амина Турхан, Алла Давыдова, Лида Ригель.
Канӑҫсӑр чунлӑ хастар тӑван чӗлхемӗршӗн, тӑван тӑрӑх аталанӑвӗшӗн, сумлӑ ентешсене тивӗҫлипе асра тытассишӗн чылай ӗҫ туса ирттерет.
+20.7 °C